Mae Archifau Morgannwg yn darparu amrywiaeth o wasanaethau i’r ysgolion, colegau a phrifysgolion sy’n ardaloedd yr awdurdodau lleol yr ydym yn eu gwasanaethu.
Diwrnodau Cynefino ar gyfer Athrawon Cynradd ac Uwchradd Mae’r Archifdy yn cynnal a chymryd rhan mewn diwrnodau cynefino sydd wedi’u trefnu gan wasanaethau addysg awdurdodau lleol a gwasanaethau cynghori fel y Gwasanaeth Addysg a Gwella Ysgolion. Caiff y dyddiau hyn eu hariannu gan Gyrfa Cymru a’r Bartneriaeth Busnes Addysg. Rydym yn canolbwyntio ar bynciau’r Cwricwlwm Cenedlaethol y mae deunyddiau’r Archifdy yn gallu eu cefnogi fel mapiau, ffurflenni cyfrifiad, cofnodion ysgolion, a ffynonellau lleol o wybodaeth ar gyfer prosiectau ar oes Fictoria a’r Ail Ryfel Byd. Lleoliadau Gwaith Athrawon Rydym hefyd yn cynnig lleoliadau gwaith i athrawon lleol sydd eisiau profiad o amgylchedd gwaith y tu hwnt i’r ystafell ddosbarth. Efallai y byddech yn hoffi cyfnod estynedig o amser i ffwrdd o’r ysgol i gyflawni gwaith ymchwil, datblygu cynlluniau gwaith a phecynnau adnoddau ar gyfer dysgu. Gellir trefnu’r rhain gydag arian gan Gyngor Addysgu Cyffredinol Cymru (GTCW/CymACC) i ddarparu athro llanw yn yr ysgol. Cysylltwch â ni os oes gennych ddiddordeb. Nid oes cost am y gwasanaeth hwn, ond rydym yn gofyn i chi rannu unrhyw becynnau adnoddau yr ydych yn eu cynhyrchu gyda ni. Adnoddau Athrawon Caerdydd: Hanes Adeiladu Prifddinas - Gwybodaeth, ffacsimilïau o ddogfennau a thaflenni gwaith ar gyfer disgyblion CA2 Archif Ymchwil Hughesovka – Gwybodaeth, ffacsimilïau o ddogfennau a thaflenni gwaith ar gyfer disgyblion Hanes CA3 a Hanes TGAU. ‘Streic’ - CD-Rom ar Derfysgoedd Tonypandy 1910 -11 a Streic Chwarel y Penrhyn, 1900 - 1903, gan ddefnyddio adnoddau o Archifau Morgannwg a Gwasanaeth Archifau Gwynedd. Mae’r CD-Rom ar gyfer disgyblion CA3, CA4, AS a Safon Uwch, gydag awgrymiadau ar gyfer CA2.
Ymweliadau Disgyblion Mae’r Archifdy yn gallu derbyn ymweliadau gan grwpiau bach o ddisgyblion ysgol neu fyfyrwyr colegau a phrifysgolion. Dylai athrawon arwain y rhain a chanolbwyntio ar y ffynonellau sydd ar gael er mwyn astudio pwnc arbennig. Rydym hefyd yn barod i gynnal taith dywys o waith cefndirol yr Archifdy a rhoi cyfle i weld detholiad o ddogfennau gwreiddiol. Gweler Ymweliadau Grwp am ragor o fanylion, yn cynnwys costau.
Profiad Gwaith Gweler ‘Swyddi Gwag a Gwirfoddolwyr’
Gofalu am eich cofnodion Mae’r Archifdy’n cadw cofnodion nifer fawr o ysgolion Morgannwg. Mae’r rhain yn cynnwys llyfrau log, cofrestri derbyn, hanes ysgolion, ffotograffau ac ati. Mae ysgolion sy’n cyflwyno cofnodion i ni yn cadw perchnogaeth yr eitemau hyn, a gallant eu gweld yn ein hystafelloedd chwilio cyhoeddus a’u defnyddio i greu arddangosfeydd ar gyfer achlysuron arbennig fel pen-blwydd ysgol. Drwy drosglwyddo’r eitemau hyn i’r Archifdy, bydd ysgolion yn sicrhau eu bod yn cael gofal priodol. Byddant yn cael eu storio yn ein hystafelloedd diogel sydd â systemau atal tân, a’u cadw mewn bocsys a ffolderi amddiffynnol i’w hatal rhag dirywio a sicrhau eu bod ar gael i genedlaethau’r dyfodol.